चमेलियाबाट दैनिक ६ घण्टा विद्युत उत्पादन गरिदै,, चमेलियाको उद्घाटन भयो तर हस्तान्तरण बाँकी।।

नयाँ नेपाल समाचार दार्चुला ,,

दार्चुलाको शैल्यशिखर नगरपालिका वडा नम्बर १ बलाँचमा निर्माण गरिएको चमेलिया जलविद्युत आयोजनाले दैनिक ६ घण्टा विद्युत उत्पादन गरिरहेको छ ।

माघ २७ गते तत्कालिन प्रधानमन्त्री शेरवहादुर देउवाले उद्घाटन गरेको दिनदेखि आयोजनाबाट नियमित विद्युत उत्पादन भइरहेको आयोजना प्रमुख अजयकुमार दाहालले बताउनुभयो । विहान ६ देखि ९ बजेसम्म र बेलुकी ६ देखि ९ बजेसम्म गरी दैनिक ६ घण्टा विद्युत उत्पादन भइरहेको दाहालले जानकारी दिनुभयो । नेपाल विद्युत प्राधिकरणअन्तर्गतको भार प्रेषण केन्द्रको प्रत्यक्ष निगरानीमा विद्युत उत्पादन कार्य भइरहेको छ । विद्युतको माग बढेको समयमा चमेलियामा विद्युत उत्पादन भइरहेको छ । विहान र बेलुकाको समयमा बढी विद्युत खपत हुने भएकाले विहान र बेलुका ३÷३ घण्टा उत्पादन भइरहेको छ । १५÷१५ मेगावाटका दुइटा टर्वाइनबाट दैनिक २५ देखि ३० मेगावाट विद्युत उत्पादन भइरहेको आयोजना प्रमुख दाहालको भनाई छ ।

अहिले चमेलिया नदीको पूरै पानी जम्मा गरेर विद्युत उत्पादन भइरहेको छ । विद्युत उत्पादन हुने समयबाहेक अन्य समय नदीमा पानी छोडिएको छैन । बिटुलेस्थित बाँधस्थलमा पानी जम्मा गरी आवश्यक परेको बेला विद्युत उत्पादन भइरहेको छ । सुख्खायाम भएकाले नदीमा पानीको सतह निकै कम छ । चमेलियामा अहिले बगिरहेको पानीबाट बढीमा ६–७ मेगावाट मात्र विद्युत उत्पादन हुन सक्छ । तर नदीको पानी बाँधस्थलमा जम्मा गरी आवश्यक भएको बेला पूर्ण क्षमतामा विद्युत उत्पादन भइरहेको आयोजनाले जनाएको छ ।

चमेलियाको उद्घाटन भयो तर हस्तान्तरण बाँकी

सात नम्बर प्रदेशमा निर्माण भएको सबैभन्दा ठूलो जलविद्युत आयोजना चमेलियाको एक महिनाअघि औपचारिक उद्घाटन गरिएको छ । तत्कालिन प्रधानमन्त्री शेरवहादुर देउवाले माघ २७ गते उद्घाटन गर्नुभएको चमेलियाले व्यवासायिक विद्युत उत्पादन पनि थालिसकेको छ । तर जलविद्युत आयोजना निर्माणमा संलग्न चीनिया र कोरियाली कम्पनीले आयोजना हस्तान्तरण गर्न बाँकी छ । आयोजनामा सिभिल निर्माणमा संलग्न चीनको सिजिजिसी कम्पनी र हाइड्रोमेकानिकल तथा इलेक्ट्रोमेकानिकल कार्यमा संलग्न कोरियाको केएनएचपी कम्पनीले हस्तान्तरण गर्न बाँकी छ । नेपाल विद्युत प्राधिकरणको पूर्ण स्वामित्व रहेको चमेलिया जलविद्युत आयोजना निर्माण सम्पन्न भएपछि दुबै कम्पनीले हस्तान्तरण गर्नुपर्ने प्रावधान छ । आधारभूत कार्यहरु सकिएपछि तत्काल विद्युत उत्पादन सुरु गरिएको आयोजना प्रमुख अजयकुमार दाहालले बताउनुभयो । केही कागजी प्रक्रिया र सामान्य कार्य मात्र पूरा हुन बाँकी भएकाले तत्काल औपचारिक उद्घाटन समेत गरिएको उहाँको भनाई छ । अहिले आयोजनास्थल बलाँचमा रहेको पावरहाउस अगाडिको आगन कंक्रिट गर्ने कार्य भइरहेको छ । सिभिलतर्फको यो कार्य चीनिया कम्पनीको जिम्मामा छ । यसैगरी पावरहाउसभित्रै इलेक्ट्रोमेकानिकल र हाइड्रोमेकानिकल कार्यको पनि फिनिसिङ भइरहेको छ । पावरहाउस अपरेट गर्नका लागि नयाँ जनशक्तिलाई सिकाउने कार्य समेत भइरहेको आयोजना दाहालले बताउनुभयो ।

आयोजनाको निर्माणमा संलग्न दुबै कम्पनीहरुले निर्माण कार्य सम्पन्न भएपछि सम्पूर्ण कार्यको प्रगति विवरण प्राधिकरणलाई बुझाउनुपर्ने उहाँको भनाई छ । सबै उपकरण प्रयोगको अवस्थासहितको विवरण प्राधिकरणलाई बुझाएसंगै हस्तान्तरण कार्य सम्पन्न हुनेछ । आयोजना निर्माणमा संलग्न कोरियाली कम्पनी केएनएचपीसंगको सम्झौताअनुसार हाइड्रोमेकानिकल र इलेक्ट्रोमेकानिकल कार्यमा आयोजना हस्तान्तरण भएपछि एक वर्षसम्मको अवधिमा कुनै समस्या आए कम्पनी जिम्मेवार हुन्छ । एक वर्षको डिफेक्ट लायविलिटी पिरियड अर्थात डिएलपी हुने भएकाले यसको गणना हस्तान्तरण भएको दिनदेखि हुने आयोजन प्रमुख अजयकुमार दाहालको भनाई छ । आयोजनामा संलग्न कोरियाली कम्पनीले प्राधिकरणलाई हस्तान्तरण गर्न अझै एकदेखि डेढ महिनासम्म लाग्ने उहाँले बताउनुभयो । सिभिल निर्माणमा संलग्न चीनिया कम्पनीले पनि केही हप्ताभित्रै आफ्नो कार्य पूरा गर्दैछ ।

देउवालाई उद्घाटनको हतारो

तत्कालिन प्रधानमन्त्री शेरवहादुर देउवाले चमेलियाको उद्घाटन गर्ने अवसर पाएका छन् । गृहक्षेत्र रहेको सात नम्बर प्रदेशमा निर्माण सम्पन्न भएको चमेलिया जलविद्युत आयोजनाको उद्घाटन गर्ने अवसरलाई देउवाले आफ्नो कार्यकालको अन्तिम समयमा उपयोग गरे । चमेलियाको उद्घाटनमा सम्बोधन गर्दै देउवाले चमेलियाको सुरुवाती पनि आफैले गरेको बताएका थिए । नेपालमा आयोजनाको सुरुवाती गर्ने र निर्माण सम्पन्न भएपछि उद्घाटन गर्ने एउटै व्यक्ति आफु भएको दावी समेत देउवाले उद्घाटन कार्यक्रममा गर्नुभएको थियो । देउवा नेतृत्वको सरकारको आयु सकिन लागेकाले तत्काल उद्घाटन कार्यक्रम आयोजना गर्न राजनीतिक वृतबाट नेपाल विद्युत प्राधिकरणको व्यवस्थापनलाई दबाव आएको बुझाइ धेरैको छ । यद्यपि चमेलिया जलविद्युत आयोजनाका प्रमुख अजयकुमार दाहाल आयोजनाको आधारभूत निर्माण कार्य सम्पन्न भइसकेको र व्यवसायिक उत्पादन सुरु भएकाले तत्काल उदघाटन गरिएको बताउनुहुन्छ । मुलुकमा भइरहेको ऊर्जाको मागलाई सम्बोधन गर्न पनि आयोजना उद्घाटन गरी तत्काल विद्युत उत्पादन थालिएको आयोजना प्रमुख दाहालको भनाई छ । आयोजनाका कतिपय निर्माण कार्य पूरा नहुँदै हतारोमा उद्घाटन गरिएको स्थानीयवासीको समेत भनाई छ । अहिले पनि आयोजनास्थलमा निर्माण कार्य भइरहेको नेकपा माओवादी केन्द्रका नेता एवं चमेलिया आयोजनास्थल बलाँचका स्थानीयवासी लालवहादुर विश्वकर्माले बताउनुभयो । चमेलियाको उद्घाटन गरी राजनीतिक फाइदा लिन र आयोजना निर्माणको श्रेय लिन देउवाले हतार हतारमा उद्घाटन गरेको शैल्यशिखर नगरपालिका वडा नम्बर १ का वडाअध्यक्ष भरतवहादुर खडायतको भनाई छ । चमेलियाको उद्घाटनका लागि हतार गर्नु राजनीतिक फाइदा लिने र आफुले उद्घाटन गरेको भनेर नाम लेखाउने काम मात्रै भएको नेकपा एमालेका नेता गंगादत्त जोशी बताउनुहुन्छ । चमेलिया उद्घाटनको एक हप्तापछि नयाँ सरकार आएकोले नयाँ सरकारका प्रधानमन्त्रीबाट आयोजनाको उद्घाटन गर्नुपर्ने उहाँको भनाई छ । पाँच वर्ष स्थायी सरकार हाँक्ने नेतृत्वले चमेलियाको उद्घाटन गरेको भए स्थानीयका माग पनि तत्काल र प्रभावकारी ढंगले सम्बोधन हुनसक्ने जोशीको भनाई छ ।

त्रिदेशीय सिमानामा पैतिस वर्षदेखि परम्परागत व्यापार भारत मालामाल, नेपाल सुन्य

दार्चुला समाचार  नेपाल, भारत र चीनको त्रिदेशीय सीमा क्षेत्रमा ३५ वर्षदेखि परम्परागत व्यापार चल्दैआएको छ । भारत र चीनबीच चल्दैआएको यस्तो व्यापार

अख्तियार दुरुपयोग अनुसन्धान आयोगमा दार्चुलाबाट २ सय २३ उजुरी दर्ता

दार्चुला समाचार, अख्तियार दुरुपयोग अनुसन्धान आयोगमा दार्चुला जिल्लाबाट २ सय २३ मुद्धा तथा उजुरीहरु परेका छन् । आयोगको स्थापना कालदेखी २०७४ साल मंसीर

प्रतिनिधिसभा तथा प्रदेशसभा निर्वाचनमा साढे पाँच करोडभन्दा बढी खर्च

दार्चुला समाचार  प्रतिनिधिसभा तथा प्रदेशसभा निर्वाचनमा दार्चुला जिल्लामा मात्रै साढे ५ करोडभन्दा बढी सरकारी बजेट खर्च भएको छ । मुख्य निर्वाचन

तटबन्ध निर्माणको कार्य सन्तोषजनक ः सिँचाई राज्यमन्त्री पुन

दार्चुला समाचार सिचाई राज्यमन्त्री अमरसिह पुनले महाकाली नदी नियन्त्रणअन्तर्गत दार्चुला सदरमुकाम खलंगामा निर्माण भइरहेको तटबन्धको कार्य