News

एक सन्तान नीति मार्चसम्म कायमै रहने, चिनियाँ दम्पतीलाई चेतावनी

चीनको उच्च परिवार नियोजन निकायले मार्चसम्म एक सन्तान नीति पालना गर्नु भन्दै चिनियाँ दम्पतीलाई चेतावनी दिएको छ । विहीबार मात्र चीन सरकारले दशकौं लामो एक सन्तान नीति अन्त्य गर्दै दुई सन्तान जन्माउन पाउने निर्णय गरेको थियो । अधिकारीहरुले नियम परिवर्तन नभएसम्म एक सन्तान नीतिमा जोड दिएका छन् । तर, दोस्रो सन्तानको लागि गर्भवती भएका महिलाहरुलाई भने कुनै सजाय दिइने छैन । चिनियाँ स्वास्थ्य र परिवार नियोजन समितिले मार्चमा विधायकहरुले दुई सन्तान नीति अनुमोदन नगरेसम्म पुरानै एक सन्तान नीति कायम रहने जनाएको छ । सरकारले ९० करोड दम्पती दुई सन्तानका लागि योग्य रहेको बताएको छ ।चीनमा जन्मदर र जनसंख्या वृद्धि दरमा कमी ल्याउन सन् १९७९ मा विवादास्पद एक सन्तान नीति लागू गरिएको थियो । तर, यो नीति परिवर्तनका लागि भने दबाब बढ्दै गएको थियो । पछि केही प्रान्तमा यो नीति खुकुलो बनाइएको थियो । एक सन्तान नीति लागू भएपछि करिब ४० करोड शिशुको जन्म रोकिएको अनुमान गरिएको थियो । यो नीति उल्लंघन गरेकोमा धेरै दम्पतीले विभिन्न किसिमका सजाय र जरिवाना पाइसकेका छन् भने गर्भपतनका साथै जागिरबाट हट्नुपर्ने बाध्यतामासमेत परेका छन् । कम्युनिष्ट पार्टीले दुई वर्षअघि औपचारिकरुपमै एक सन्तान नीति खुकुलो पार्ने जनाएको थियो ।

 

सामाजिक संजाल

More

भिडियोहरु